Tuh manuh comu tu boca
y tu boca comu la nievi
d'una cumbri en Tornavacah...
y tú te vihtih de verdi.

Tuh pechuh comu tu'sojuh
y tu'sojuh comu el sol
que dehpierta a Jerti...
y tú te vihtih de verdi.

Tuh labiuh comu tu corazún
y tu corazún comu la piel
de la cereza en Cabezuela...
t tú te vihteih de verdi.

Tuh cabelluh comu tuh lágrimah
y tuh lágrimah comu la lluvia
d'un domingu en el Tornu...
y tú te vihteh de verdi.

Tu risa comu tu rohtru
y tu rohtru comu la luna
y lah ehtrellah de Navalconceju...
y tú te vihtih de verdi.

Tu piel comu tu mirá
y tu mirá comu el cielu
y el joricenti en Piolnal...
y tú te vihtih de verdi.

Tu voh comu tu curpu
y tu cuerpu comu e'límpetu
de la primaera en Vadehtillah...
y tú te vihtih de verdi.

Tuh nochih comu tuh díah
y tuh díah encantauh
co'nel encantu del Rebollal...
y tú te vihtih de verdi.

Tuh mañanah comu tuh tardih
y tuh tardih, blancah
comu la flol del cerezu
en Casah del Cahtañal...
Y tú te vihtih de verdi.

Tu anochecil comu tu amanecil
y tu amanecil comu la paz
y lah sombrah en Cabraru...
y tú te vihtih de verdi.

Tu ternura comu tu soleá
u tu soleá comu la ternura
y soleá e'nel Barrau...
y tú te vihtih de verdi.

Tu deseu comu tu juventú
y tu juventú comu'na nochi
de fiehta en Plasencia...
y tú te vihtih de verdi.

Tu vía comu tu sueñuh
y tu sueñuh comu esi sueñu
inolvidabli que llaman
el Valli del Jerti...
Y tu te vihtih de verdi.

Y la jermosura eh verdi..

Ehta puesía de er YiYi (Miguel Angel Luengo, sobrino de Florencio el Albardero) no rehpondi a luh cánonih clásicuh -no tieni rima ni sílabah cuntáh, aunqui sí se urganiza claramenti en cualtetuh), sinu que máh bien eh deudora de la libertá creativa que floreció en Europa endi luh arborih del siglu XX, cuandu ya Vayi Inclán ehpeimentó con el Modelnihmu, y máh taldi, con la generación del 27, pol no jablal de luh puetah del 50, luh de l'experiencia,etc y puhteriorih. Toa esa genti utilizaba, amáh de lah folmah clásicah, la versificación libri, que no quieri icil que la puesía la ehcriba ca unu comu le de la gana y ali payá, sinu que máh bien el pueta se libera d'un corsé, que en muchah ocasioneh le impedía jablá claramenti de suh sentimientuh máh íntimuh y humanuh, y buhca otrah folmah de expresá luh suh sentimientuh y de creal beyeza.
¿Qué formah son esah?
Luh modelnihtah buhcaban la metáfora irracional o surrealihta a travéh de la sinehtesia, y pa eyu usaban l'ehcritura autumática -aqueyu que sali de la menti direhtamenti, sin máh filtru que el'ihtintu-, buhcaban el rihmu ocultu de lah palabrah, lah aliteracionih, el susurru de luh soníuh, con palabrah antiguah, evocaorah, que paeciera que ehtaban renaciendu ca ihtanti. Y esa sabia nueva, que servía pa icil lah cosah peru sin nombrarlah, se ehtruhturaba en el puema a travéh de luh versuh y de lah ehtrofah -aliteracionih a principiuh de velsuh, polisíndeton entri luh versuh y lah ehtrofah, cambiu de ritmu,versuh de güerta comu lah antiguah cantigah y jarchah, etc-.
Por tantu, versificación libri, sin la rima manida y raída por tantuh sigluh con la mehma toná, peru búhquea de ritmu, de música, de sentimientuh persunalih labrauh en el'alientu de luh versuh, d'autenticiá evocaora a travéh de la metáfora surrealihta.
En el puema de er YiYi, poemuh vel claramenti que s'ehtrugtura en tornu a luh cualtetuh, luh cualih, a su vez se valin de una dobli comparación entri elementuh persunalih de iferentih cualidaih u grauh que se vieltin, a su vez, en un elementu de la madri naturaleza. Y ehti últimu elementu eh el que moh endilga pa ca unu de luh puebluh jerteñuh. Peru no acaba ahína la cosa, ca cualtetu se corona con un velsu de güerta que se repiti, al ehtilu lorquianu, pa recoldalnuh ca ihtanti el argumentu y motivu de luh velsuh: la personificación ehtrucutural que el gran bardu, YiYi el garganteñu, ha jechu der vayi el jerti, polqui a la vihta ehtá que esa mujel que si vihti de veldi no eh Paca la Feligrasa sino máh bien to er vayi con su verdó y su bravía naturaleza.
Eh, amiguinuh, eh!!, no ejeih agora el mensaji, polqui tenéih que sabel que er Yi Yi, no contentu con tóh esuh recursuh literariuh modelnuh, manqui ya van tamién argu antiguinuh,refueelza l'ehtructura de su puema jerteñu con un polisíndeton entri luh versuh -ar comienzu-, el cual s'increimenta a meía que muh acelcamuh al final, intensificandu el ritmu del puema pa yevalnuh al remati final:

Tu vía comu tu sueñuh
y tu sueñuh comu esi sueñu
inolvidabli que llaman
el Valli del Jerti...
Y tu te vihtih de verdi.

Y la jermosura eh verdi..