LENGUAS VULGARIS
LENGUAS CULTAS... (?)

Ca agrupamientu de presonas que compartin un mesmu sentil drentu d'un mesmu espaciu tiendi a dil creandu unus mesmus estilus de vivil y comunicalsi.

Ca lengua, ca variedd lingiiistica, va entreteciéndusi duranti una tupa siglus pol mé d'una tupa d'enfluencias de pueblus qu'han díu invadiendu u poblandu esi sitiu concretu.

ME paeci INTOLERANTI abondu jacel clasificacionis -cuasi siempri pol razonis políticas, económicas- de lenguas u jablas cultas y lenguas u jablas vulgaris...

Paeci sel qu'esi castellanu gelmanu del Astur-leonés, u galaicu-portugués u aragonés u catalán (considerau "lingua vulgaris" pol pro-latinus en los sus escomienzu), agora tieni que sel más cultu qu'el estremeñu u algotra variedá paí minoritaria...

Nu soi escapá d'entendelu.

Ciertu es, y to hay qu'almientalu; qu'el inglés es un idioma de gran pulvenil y que er castellanu silvi de ñúu d'unión entri cuasi cuatru cientus de millones d'habitantis, en esti el nuestru planeta,... peru con to'l mi respetu, nu se pué fechal con juertis fechaúras en un mesmu arca a to los palraris minoritarius, embuchandu pa siempri formas de vivil y sentil únicas.

Y velaquili, en Estremaura mus estamus escachandu al nuestru miejón y a la nuestra idiosincrasia cultural, rejuyendu el tesoru del nuestru legáu lingüisticu,... jaciendu sin basi lógica nenguna acusacionis de VULGARISMU, pisoteandu la juéyiga que mus han díu ejandu célticus, vaceus, vetonis, lusitanus, romanus, visigodus, árabis, astur-leonesis, galaicu-portuguesis y castellanus, etc. Baju el apoyu intransigenti d'unus medius de comunicación pocu armoniosus y unus estamentus impresentablis.

Los mesmus estremeñus u estremeñas paecin sentilsi VULGARIS y sientin velgüenza al jacel el cierri de vocalis finalis 0:-U y E:-I (entovia unías más al latín "cultus"), natural y normal d'una repoblación, dispué'l dominiu árabi, prencipalmenti astur-leonesa. Asina que ya naidi es osáu d'icil: "parienti, imposibli, labutu, tieni, nuestru, vuestru, míu, u mesmamenti nuecis verdis"...

¿Deberie d'igual móu, sentil vulgal a la su lengua nacional un rumanu ijendu "parenti, imposibil, lucru, aveti, nostru, vostru, meu... nuci verzi".

Premitami que me riya una mijirrinina.

A naidi se l'ocurri ya, velaí, antiponel el articulu elanti los posesivus: "la mi casa, el mi amigu"... Jasta aí puíamus llegal.

¡cutainus burrinus!

Pobrinus portuguesis incultus: "a minha casa", "o meu amigo", asturianus incultus: "la mió casa, el mió amigu", catalanis incultus "la meva casa, el meu amic", italianus incultus: "la mía casa, el mío amico".

En cuantu a vocabulariu, es vulgarismu
icil "mesmu", más prósimu al "metipsimus" latinu, u al "mesmu" asturianu u al "mesmo" gallego-portugués... u al "meme" frances.

U almiental tan siquiá el "nengunu ("nec unus" en latin), u "metá" ("medietasatis" latinu, "metade" gallegu-portugués, "meta" italianu...), etc.,pol ponel ejemplos.

Enfin, nu esistin lenguas vulgaris y lenguas cultas, namás

VARIEDADIS LLNGUISTICAS...,

icil lo contrariu es INCULTURA, VULGARIDA.

Y es cultu habel conocencia de castellanu e inglés y alemán y francés y arameu... y quechua, kenuzi-dongola y macedónicu.

Peru tamién: estremeñu, lagarteiru, mañegu, valverdeiru u oliventinu.

Sencillamente.

¿Sabían queen Reinu Uníu aparti el inglés (55.000.000 habitantis) se jabla: ANGLOROMANI (90.000 h.) BRITISH SIGN, CORNIS, GAELIC IRISH, GAELIC SCOTS (88.829 h.), MANX, (OKL), (PLD), TSIGANE, ROMANI-WELSH, SCOTS, (TRL), WELSH (572.102 H), entri otrus? ¿Qu'en Francia aparti el Francés (51.000.000 h.): ALSATIAN (1.500.000 h.), BREZHONEG (500.000 h.), CORSU (200.000 h.), PROVENNAU (250.000 h.), GASCON (250.000 h.), CATALA (260.000 h.), EUZKARAZ (90.000 h.)..., y asina jasta 28 lenguas y otru jaci grandi de dialectus?

¿Qu'en Italia se jablan 32 lenguas y una tupa dialectus?, ¿Y en Méxicu: 248 lenguas e innumerablis dialectus?

Y queáivus segáus:

¿sabiais qu'en PAPUA NUEVA GUINEA, una isla y unas islinas con apeninas 461.691 km2, se palran cuasi 900 lenguas y cientus y cientus de variedadis dialectalis?... (datus arrepañáus en SUMMER INSTITUTE OF LINGUISTICS; INC. DALLAS, TEXAS).
Y en efeutu, serie mestel que tos jablásimus en ESPERANTU, peru velaí.

Antoniu Garrido

Güervi a la hojina principal